ក្រចេះ៖ ស្នងការនគរបាលខេត្តក្រចេះ កោះហៅមេប៉ុស្តិ៍នគរបាលស្រែចារ ដែលបញ្ឈប់ការសម្ដែងក្រុមល្ខោនបាសាក់ពាក់កណ្ដាលទីទាមទាររកលិខិតអនុញ្ញាតនៅក្នុងពិធីបុណ្យកឋិនក្នុងវត្តមួយ ស្ថិតក្នុងស្រុកអង្គស្នួល ខេត្តក្រចេះ កាលពីយប់ថ្ងៃទី២១ ខែវិច្ឆកា ឆ្នាំ២០២៣។

ស្នងការនគរបាលខេត្តក្រចេះ លោក អ៊ូ សុបុណ្ណា នាថ្ងៃទី២៣ ខែវិច្ឆិកា ឆ្នាំ២០២៣ បានថ្លែងប្រាប់ EAC News ថាក្រុមប្រឹក្សាវិន័យនៃស្នងការដ្ឋាននគរបាលខេត្តក្រចេះ បានប្រមូលព័ត៌មាននឹងអនុវត្តតាមវិន័យរបស់កងកម្លាំងនគរបាលជាតិហើយមកទល់ពេលនេះ។

ជាមួយគ្នានេះអគ្គនាយកបច្ចេកទេសវប្បធម៌ លោក ស៊ីយ៉ុន សុភារិទ្ធិ ក៏បានថ្លែងប្រាប់ EAC News ឱ្យដឹងដែរថា ជាធម្មតាក្រុមល្ខោននីមួយៗតែងមានការទទួលស្គាល់ចុះបញ្ជីជាមួយមន្ទីរវប្បធម៌ និងវិចិត្រសិល្បៈ ខណៈករណីខាងលើនេះ លោកមិនអាចវិនិច្ឆ័យថាភាគីណាខុសត្រូវនៅឡើយ ដោយលោកក៏កំពុងប្រមូលព័ត៌មានពិនិត្យមើលបន្ថែមផងដែរ។

លោក ស៊ីយ៉ុន សុភារិទ្ធិ គូសបញ្ចាក់ថា ទាំងក្រសួងវប្បធម៌ និងមន្ទីរវប្បធម៌ តែងលើកទឹកចិត្ត និងគាំទ្រនូវសកម្មភាពដែលលើកស្ទួយ លើកតម្កើងដល់វិស័យវប្បធម៌។

លោកថ្លែងថា៖ «ខ្ញុំយល់ថា ទាំងអស់គ្នាដឹងហើយថាល្ខោន ឬវិស័យសិល្បៈទស្សនីយភាព សព្វថ្ងៃនេះត្រូវមានការគាំទ្រ លើកទឹកចិត្តជ្រោមជ្រែងជាច្រើន ខ្ញុំយល់ថារឿងទាំងនោះជារឿងសំខាន់ [….] ចំពោះក្រសួងឬមន្ទីរក្តីគឺគាំទ្រដល់សកម្មភាពដែលលើកស្ទួយដល់វិស័យវប្បធម៌នេះ»។

គួរឱ្យដឹងដែរថា កាលពីថ្ងៃទី២១ ខែវិច្ឆិកា ឆ្នាំ២០២៣ ក្រុមល្ខោនបាសាក់ (នាយប្រិមប្រិយ) ដែលកំពុងតែសម្ដែងជូនប្រជាពលរដ្ឋទស្សនានាពេលរាត្រីក្នុងពិធីបុណ្យកឋិននៅ នៅវត្តអូរលុង ស្ថិតក្នុងភូមិ អូរលុង ឃុំស្រែថា ស្រុកស្នួល ខេត្តក្រចេះត្រូវបានមេប៉ុស្តិ៍មកបញ្ឈប់ពាក់កណ្ដាលទី និងសុំត្រួតពិនិត្យមើលឯកសារ ដែលបង្កឱ្យមានការភ្ញាក់ផ្អើលប្រជាពលរដ្ឋអ្នកទស្សនា ក៏ដូចជាចៅអធិការវត្តមកជួយសម្របសម្រួល៕